काठमाडौं । नागरिक लगानी कोषले आफ्नो ३५औं वार्षिकोत्सवका अवसरमा राष्ट्र निर्माण र सरकारका प्राथमिकता अनुसारका आयोजनामा लगानी वृद्धि गर्ने उद्देश्य अघि बढाएको जनाएको छ। कोषले नीतिगत सुधारका साथ लगानी विविधीकरण गर्नुपर्ने चुनौतीको सामना गर्दै सरकारको प्राथमिकतामा रहेका क्षेत्रहरूमा लगानी बढाउने प्रयास गरिरहेको पनि बतायो।
कोषका कार्यकारी निर्देशक पर्वतकुमार कार्कीले लगानीको दायरा विविधीकरण गर्नु पर्ने आवश्यकता रहेको बताएका छन्। उनले भने, “कोषले छरिएर रहेको पुँजीलाई एकीकृत गर्दै राष्ट्र निर्माणका लागि सरकारका प्राथमिकतामा रहेका क्षेत्रमा लगानी वृद्धि गर्ने चुनौतीसँग जुध्दैछ,” साथै, “कृषि, उद्योग, होटल र पर्यटन क्षेत्रमा लगानी बढाउनका लागि नीतिगत सुधार आवश्यक छ,” भने।
कार्यक्रममा अर्थसचिव घनश्याम उपाध्यायले सरकारले मुलुकको आर्थिक वृद्धि र पूर्वाधार विकासका लागि अवलम्बन गरिरहेको नीति र कार्यक्रमको मार्गदर्शन गर्दै अघि बढिरहेको बताए। उनले कोषलाई सेवा सुधार र पारदर्शिता सुनिश्चित गर्दै जनताको विश्वास जित्नका लागि विविध क्षेत्रमा लगानी बढाउन आवश्यक रहेको औंल्याए।
नागरिक लगानी कोषका अध्यक्ष प्राडा सूर्यबहादुर थापाले कोषको स्थापना कालमा दुई करोड ४४ लाखबाट शुरु भएको संस्थाले अहिले २ खर्ब ७३ अर्ब ७२ करोडको वित्तीय स्रोत संकलन गरेको जानकारी दिए। कोषले कृषि, पूर्वाधार, उद्योग र पर्यटन जस्ता उत्पादनमूलक क्षेत्रमा लगानी गर्नुपर्ने आवश्यकता महसुस गरेको छ।
कोषले हालसम्म २६४ अर्ब विभिन्न क्षेत्रहरूमा लगानी गरेको र साढे ६ लाख सहभागीलाई सेवा दिइरहेको जानकारी दिइएको छ।
