काठमाडौं, ५ फागुन । नेपाली महिला राष्ट्रिय क्रिकेट टोली आगामी मार्च ८ देखि युगान्डामा सुरु हुने वुमन्स डे कप प्रतियोगितामा सहभागी हुन युगान्डा प्रस्थान गरेको छ। नेपाल क्रिकेट संघ (क्यान)का अनुसार, यस प्रतियोगितामा नेपाली टोली इन्दु बर्माको नेतृत्वमा मैदान उत्रनेछ।
मुख्य प्रशिक्षक महेश कटुवालले तयारीका बारेमा बोल्दै, यसपटक कप जित्ने आत्मविश्वासका साथ टोलीले प्रतियोगितामा भाग लिइरहेको जानकारी दिएका छन्। उनले भने, “हामी धेरै राम्रो प्रदर्शन गर्नेमा विश्वास राख्छौं। यू–१९ का अधिकांश खेलाडी टोलीमा छन् र उनीहरूसँग पनि राम्रो अनुभव छ। सिनियर र यू–१९ खेलाडीमा म धेरै भिन्नता देख्दिनँ।”
कटुवालका अनुसार, टोलीले विशेष गरी फिल्डिङ र फिटनेसमा बढी प्रशिक्षण गरेको छ र अनुभवी तथा युवा खेलाडीहरूको सम्मिश्रण यसपटकको रणनीतिमा समावेश गरिएको छ।
कप्तान इन्दु बर्माले पनि टोलीको तयारी राम्रो भएको र उनीहरूसँग बलियो टोली बनेको विश्वास व्यक्त गरिन्। उनले भनिन्, “हामी सबैजनाले एकअर्कालाई मार्गनिर्देशन गरेर खेल्नेछौँ। युगान्डामा राम्रो प्रदर्शन गरेर फर्कनेमा विश्वास छ।”
क्यानका सचिव पारस खड्काले प्रतियोगिता खेलाडीहरूको लागि अनुभव बटुल्ने ठूलो अवसर भएको बताउँदै, महिलाकेन्द्रित क्रिकेट आयोजनामा यो प्रतियोगिता महत्त्वपूर्ण रहेको बताएका छन्।
प्रतियोगितामा नेपालसहित नामिबिया, हङकङ र युगान्डा गरी चार देश सहभागी छन्। नेपालले मार्च ८ मा नामिबिया, मार्च १० मा हङकङ र मार्च १३ मा युगान्डासँग प्रतिस्पर्धा गर्ने तालिका तय भएको छ।
नेपाली टोली: कप्तान इन्दु बर्मा, बिन्दु रावल, रिया शर्मा, सम्झना खड्का, ममता चौधरी, पुजा महतो, राजमती एैरी, कविता जोशी, रुबिना क्षेत्री, अलिशा कुमार यादव, रोमा थापा, रचना चौधरी, साना चौधरी, सना प्रविन, इश्वरी विष्ट।
