श्रीलङ्काको हबराना क्षेत्रमा यात्रुवाहक रेल हात्तीको बथानसँग ठोक्किँदा ६ वटा हात्तीको मृत्यु भएको छ। दुर्घटनामा घाइते भएका २ हात्तीको उपचार भइरहेको छ।
श्रीलङ्कामा रेल र हात्तीबीच यस्ता दुर्घटना पटक–पटक हुने गरे पनि यो अहिलेसम्मकै सबैभन्दा गम्भीर घटना भएको बीबीसीले जनाएको छ। यस दुर्घटनामा मानवीय क्षति भने नभएको बताइएको छ।
श्रीलङ्काको वन्यजन्तु संरक्षण निकायका अनुसार हरेक वर्ष रेल दुर्घटनामा झण्डै २० हात्ती मारिने गरेका छन्। त्यसबाहेक, मानव–हात्ती द्वन्द्वका कारण गत वर्ष मात्रै १७० भन्दा बढी व्यक्तिले ज्यान गुमाउँदा ५०० हात्ती मारिएका थिए।
वन फँडानी र प्राकृतिक स्रोतको अभावका कारण हात्तीहरू मानव बस्तीमा पसेर दुर्घटनाको सिकार बन्न थालेका छन्। रेल दुर्घटना बाहेक, हात्तीहरू बिजुलीको करेन्ट, विषाक्त खाना र चोरी सिकारीको मारमा पर्ने गरेका छन्।
