विपद् विज्ञहरूले पहिरोको पूर्वानुमान गर्न विश्वसनीय विधि विकास गर्न सकिने निष्कर्ष निकालेका छन्।
सिन्धुपाल्चोकका हेलम्बु र पाँचपोखरी थाङपाल गाउँपालिकामा पहिरो जाने प्रक्रिया अध्ययन गर्न वर्षाको सीमा आँकलन गरी जल तथा मौसम विज्ञान विभागको पूर्वानुमान प्रणालीमा समावेश गर्ने प्रयास गरिएको थियो। अध्ययनपछि विज्ञ टोलीले पहिरोको पूर्वानुमान गर्न सकिने निष्कर्ष निकालेको हो।
अध्ययन नेतृत्वकर्ता त्रिभुवन विश्वविद्यालयका सह–प्राध्यापक डा. रञ्जनकुमार दाहालका अनुसार तथ्याङ्कको आधारमा पहिरो पूर्वानुमान गर्ने विश्वसनीय विधि विकास गर्न सकिन्छ। उनले जोखिम सञ्चार रणनीति र समुदायस्तरमा सचेतना कार्यक्रम सञ्चालन गर्नुपर्ने आवश्यकता औँल्याएका छन्।
अध्ययन प्रतिवेदन राष्ट्रिय विपद् जोखिम न्यूनीकरण तथा व्यवस्थापन प्राधिकरणमा बुझाइएको छ। प्राधिकरणका कार्यकारी प्रमुख डा. भीष्मकुमार भुसालका अनुसार विपद् पूर्वसूचना प्रणाली विकासमा भइरहेको प्रयासमा यो अध्ययन महत्त्वपूर्ण हुनेछ।
अध्ययनअनुसार हेलम्बुमा २४ घन्टामा १२४ मिलिमिटर र पाँचपोखरी थाङपालमा ११८ मिलिमिटर पानी परेमा पहिरो जाने देखिएको छ। नेपालमा अहिलेसम्मका अध्ययनअनुसार दैनिक ११५ देखि १६० मिलिमिटर पानी परेमा पहिरो निम्तिने गरेको पाइएको छ।
यस अध्ययनले पहिरोको पूर्वानुमान प्रणाली विकास गर्न वैज्ञानिक आधार तयार गर्न सक्ने निष्कर्ष निकालेको छ। साथै, वर्षाको मात्राले पहिरो जाने सीमा निर्धारण गर्न सकेमा विपद् जोखिम व्यवस्थापन रणनीति बनाउन सजिलो हुने सुझाव दिइएको छ।
