बास्कोटाले नेकपाको एकता र विभाजनलाई इतिहासका दृष्टिकोणबाट विश्लेषण गरे

काठमाडौँ — नेकपा एमालेका पोलिटब्युरो सदस्य तथा सांसद गोकुल बास्कोटाले कम्युनिष्ट राजनीतिको सबैभन्दा सुखद इतिहास जननेता मदन भण्डारीको उदय र ‘जवज’ सिद्घान्तको प्रतिपादन भएको बताएका छन्।

आज (बिहीबार) सामाजिक सञ्जालमार्फत उनले नेकपाको एकता र पछि भएको विभाजनलाई दुःखद इतिहासको संज्ञा दिएका छन्। बास्कोटाले लेखेका छन्, ‘‘नेपालको लोकतान्त्रिक र कम्युनिष्ट राजनीतिको सर्वाधिक सुखद इतिहास जननेता मदन भण्डारीको उदय र जवजको प्रतिपादन हो भने दुःखद इतिहास नेकपाको लहडी एकता र दुर्दान्त विभाजन।’’

उनले वामपन्थीहरू अधिकारका लागि लड्न सक्ने तर मिल्न नसक्ने प्रवृत्तिले दीर्घकालसम्म समस्या हुने दाबी गरेका छन्। पछिल्लो समय देशको राजनीतिक उथलपुथलप्रति लक्षित गर्दै बास्कोटाले यस्तो टिप्पणी गरेका हुन्।