83
Shares
काठमाडौं – कम भिजिबिलिटीमा पनि उडान र अवतरण गर्न सक्ने प्रणाली जडानपछि भैरहवा विमानस्थलमा यात्रु आवागमनमा वृद्धि भएको छ। गौतमबुद्ध अन्तर्राष्ट्रिय विमानस्थलमा रिक्वायर्ड नेभिगेसन पर्फर्मेन्स अथोराइज्ड रिक्वायरमेन्ट (RNP-AR) प्रणाली जडान भएपछि फेब्रुअरी महिनामा ६ हजार ७९ यात्रुले भैरहवा हुँदै यात्रा गरेका छन्।
सबैभन्दा धेरै यात्रु ओसारपसार गर्नेमा जजिरा एयरवेज पहिलो स्थानमा रहेको छ, जसले ३२६५ यात्रु भैरहवा ल्याएको छ। दोस्रो स्थानमा २४०३ यात्रु ओसारेको फ्लाई दुबई रहँदा, तेस्रो स्थानमा १०९७ यात्रु ओसारेको थाई एयर एशिया छ। फेब्रुअरी महिनामा १३ वटा चार्टर्ड उडानसमेत भए, जसमा २११ यात्रु आएका थिए।
नेपाल एयरलायन्समार्फत भने जम्मा एक यात्रु आएको तथ्यांक छ। महाप्रबन्धक प्रतापबाबु तिवारीका अनुसार फेब्रुअरीको तथ्यांक हालसम्मकै उच्च हो। हाल भैरहवाबाट सातामा १५ उडान भइरहेका छन्।
