काठमाण्डौ – फागुनको मध्यमा वर्षाले केही हदसम्म घटाएको वायु प्रदूषण फेरि बढेको छ। काठमाण्डौ उपत्यका साथै देशका धेरै शहर र तराईका क्षेत्रमा प्रदूषणको स्तर उच्च रहेको देखिएको छ। आज दिउँसो, काठमाण्डौ विश्वका ठूला प्रदूषित शहरहरूको सूचीमा भियतनामको हानोईपछि दोस्रो स्थानमा रहेको पुष्टि भएको छ। विश्वभरका प्रदूषण मापन गर्ने संस्था IQ Airका अनुसार, दिउँसो काठमाण्डौमा हावाको प्रदूषण सूचकांक (AQI) १९० भन्दा माथि पुगेको छ, जसले स्वास्थ्यका लागि गम्भीर खतरा उत्पन्न गरेको जनाउँछ।
AQI १५० भन्दा माथि पुग्दा स्वास्थ्यका लागि अस्वस्थ अवस्थाको संकेत मानिन्छ। काठमाण्डौ उपत्यकाका अधिकांश मापन केन्द्रहरूले आज दिउँसो AQI १५० भन्दा माथि देखाएका छन्। साथै, वातावरण विभागका तथ्याङ्कअनुसार काठमाण्डौ उपत्यकाबाहिरका धनगढी, अछाम, सुर्खेत, दाङ, पोखरा लगायतका शहरहरूमा पनि प्रदूषणको स्तर अस्वस्थताको सीमा नाघेको छ।
स्वास्थ्य विशेषज्ञहरूले भनेका छन् कि अत्यधिक प्रदूषणले श्वासप्रश्वाससम्बन्धी समस्यासँगै आँखा, मुटु लगायतका अंगहरूमा समस्या निम्त्याउन सक्छ, त्यसैले नागरिकहरूले विशेष सावधानी अपनाउन आग्रह गरिएको छ।
